Clec amdani - Esyllt Maelor

Josh hasn't had an easy life in recent years. He and his mother have had one blow after another. A short novel, with filmic-like scenes, for older teenagers.

Mae Clec Amdani yn agor gydag ystafell wely lawn llanast, a menyw yn crio o dan y dwfe. Darlun o anobaith llwyr ac arwydd bod rhywbeth mawr o'i le. Mam Josh sy'n cuddio o dan y dwfe, ac yn y nofel fe glywn ei stori hi a'i mab, a hynny yng ngeiriau Josh. Arweinodd tor priodas at yfed trwm, yfed sy'n cael ei guddio ar y dechrau tan bod cyflwr y fam yn dirywio i'r fath raddau nes bod dim ots ganddi pwy sy'n gwybod am ei halcoholiaeth, a dim ots chwaith am yr hyn sy'n digwydd iddi hi a'i mab. Roedd fy nghalon i'n gwaedu dros Josh wrth iddo geisio parhau 'i fywyd 'normal', gan wybod nad oedd ei fam bellach yn poeni dim amdano a'i fod yn methu ei helpu hi.

Mae'r nofel yn adrodd stori ddirdynnol mewn ffordd drawiadol a chofiadwy. Mae pob pennod yn dechrau gyda cwestiwn i Josh, cwestiwn mae'n ceisio ei orau i'w ateb. Dyw hi ddim yn amlwg ar y dechrau pwy sy'n gofyn y cwestiynau, a pham. Mae'r stori'n cael ei datgelu'n raddol, gan gyrraedd diweddglo annisgwyl. Nid mwynhau yw'r gair cywir o gofio'r hyn sy'n digwydd yn y nofel, ond mae'r stori wedi'i hadrodd yn dda iawn gan awdur sy'n gwybod sut i ysgrifennu ar gyfer pobl ifanc.
Cerian Arianrhod @ www.gwales.com